A mol wos vo ganz Frieher
Nachn Krieg hat die Nemberger Tante ba uns gwohnt,
ihr Haus hobn die Flieger bombartiert.
Sie hat zwischndurch a Bilder gmolt
und des hat mich als Bu interessiert.
Ihr Bilder hat sie mit Wasserfarbn gmolt
und hat gsogt, zu de Bilder segt mer Aquarell.
Wie ich ihr manchmol bam Moln zugschaut hob,
hob ich festgstellt, des Bilder moln geht net su schnell.
Sie hat hauptsächlich Bam und Bluma gmolt,
denn die Natur de hat sie ganz arch Verehrt,
friher hat sie a Usichtn vom altn Nemberg gmolt,
doch des hems im Krieg fast ganz zerstört.
Sie hätt a gern manchmol a Bild verkafn wolln,
doch in der schlechtn Zeit wor des mastns umersunst
und drum hat do mei Großvatä immer wider gsogt,
des mit dem Mohln do des is a brotlose Kunst.
Die Fotos vom Osterfeuer heut sen scho Online
Wenn ihr ans von die Fotos in Größer wollt dann schickt mir a Mail an r.wening@gmx.de, in a boor Doch kummt dann die Datei.
Den Karfreidoch mol a Gedicht vo meim Vatter statts neia Foto
Heit hat mier etz bo dem triebn Weder des Rumlafn mit meim Foto net su arch gfalln, also hol ich des noch und mach halt erst amol a Gedichtla do nei.
A Gschmiesla
Wal mir do unser fränkischa Sproch gfällt
hob ich mich halt zu aner Tagung ugmeldt
ba aner Gruppn ,die Mundart in der Kärch hasst
und sich mit fränkisch redn in der Kärch befasst.
Ba der Teilnehmerlistn wor die Überraschung gross,
lauter wunner wos, ich wor der anzige Bauer blos.
Die andern sen Pfarra, Lehrer und sunst wos gwen,
alles studierta Leit de wu viel gscheiter sen.
Hob i mer denkt, dass ich do a aweng pass derzu,
Du i net lang rum und ziech a Gschmiesla u.
Doch der anzi der nu a Gschmiesla u ghabt hat,
des wor der Oberkirchenrat.
Mol ans vo mir zur Johreszeit.
An jedn Doch wenn ich in mei E-Mail schau
dann werd des mir im Mong scho ganz flau.
Jeder schreibt do, dass du Ohnemma musst,
Viel Beweng und dich a Ernährn bewusst.
Wie ich dess su les griech ich an Schreck,
wuher wissn de des mit mein zvieln Speck?
Ich will etz alles Wissn und les weiter,
vieleicht wer ich ja do durch a gscheiter!
Do steht das Diätn und FDH gor nix Nutzn,
wal erst muss die a mol innerli durchputzn!
Vo die Schlackn entferna secht su a Professor,
wall dann geht des mitn Ohnemma viel besser!
Des geht mit denna ihr Tablettn fast ganz ala,
do bruchst dann a net viel in Bewechung sa,
des kost die a blos 8 Euro fier an Doch,
do derfier sborst der Bewechung und Bloch.
Hob ich bo mir denkt, des horcht si gut U,
Schaust mol im Internet, wos is do dru?
Do steht, dass de wu des Zeich teier verkafn
die anzin gefährlin Schlackn sen wu rumlafn.
Ich hob etz wider a mol an Gedicht gfunna
Vo die Kinner, vur allm aus der Stadt,
su mancher vom Vichzeich keine Ahnung hat
vo die Viecher do draußn in der Natur,
wies des su is in Dorf, Wald und Flur.
Su kummts, es werd immer mehr Kinder gem,
die wissen nur, wos sie im Fernseh sehn
und drum hobn viel vo die Kinner gwisst,
dass die Kuh wie af der Milka lila is.
Homs ane über den Nutzn der Ziegn gfrocht,
do hat dann drauf glei der Fritzla gsocht:
"Vo der Geiß, die Milch und Käse bekommen wir
und vom Bock, da kriegn wir nur das Bier."
Am Mittwoch worn des 4 Johr dass mei Vatter gschdrom is
Abschied
Heit steh ich etz do an deim Bett
A haufn Schleich henga dru an dir
Du lichst su do und sichst mich net
Dei Hend sen kalt das ich fast frier.
Nu su viel hätt ich dir zum sogn
Wos ich dir nu nie hob gsocht
Nu su viel hätt ich dich zum frogn
A wenn ich dich hob scho viel gfrocht
Ich steh blos do und halt dei Hend
Konn fur greina fast ka Word redn
Du lichst do, wardst af dei End
Konnst nemmer amol zum Herrgott bettn
Hätt ich dir doch gsocht, wie sche des is
Einfach blos mit dir a weng zum wafn
Hast der a oft Sorgn gamcht, des was ich gwies
Hast di a gfreit wenn alles wider wor am lafn
Ober iber a Gfühl, do hom mir nie gred
Do sen mir zwa gleich, dess kenna mir net
Etz wollert ich es dir sogn, doch es is zspät
Du lichst bleich do, ich steh an deim Bett.
A mol a Gedicht vo am echtn Faschingsmuffl
Der Hanni schaut immer ernst drei
den sieht mer gor net lachn,
a wenn die andern Leit lusti sen,
sicht mern ka freindlis Gsicht machen.
Und wenn sich die andern Leit freia
denna Lachn und gscheit Lusti sei,
der Hanni verziecht sei Gsicht net,
er schaut immer blos granti drei.
Wenn die Andern lachn ohne Grund,
dann härst den Hanni manchmol sogn:
Geh zu, reiß mir a mola Ba raus,
dass ich a mol su Bled lachn konn.
Insgesammt 103 Artikel |
Seite: 1 von 11 |
...
Iich moch dii Gedichte vo dain Vaddä unn dii Leut, dii iich kenn lesen dii Sachn auch arch gern....